បន្ទាយមានជ័យ ៖ អាជ្ញាធរខេត្តបន្ទាយមានជ័យ បានចុះរៀបចំទួលសុវត្ថិភាព សាងសង់រោង ត្រៀមសម្រាប់ទទួលបងប្អូនប្រជាពលរដ្ឋ ដែលរងគ្រោះដោយសារទឹកជំនន់ នៅក្នុងក្រុងសិរីសោភ័ណ ខណៈទឹកស្ទឹងបានបន្តកើនឡើង ជាបន្តបន្ទាប់ ហើយផ្លូវលំមួយចំនួននៅក្នុងក្រុងត្រូវទឹកហូកាត់ជាច្រើនកន្លែង។
រដ្ឋបាលក្រុងសិរីសោភ័ណ កាលពីថ្ងៃទី២២ ខែកញ្ញាបានជម្លៀសពលរដ្ឋចំនួន៩៥គ្រួសារពីក្នុងសង្កាត់អូរអំបិល និង១៨គ្រួសារពីសង្កាត់ព្រះពន្លា ចេញទៅទីទួលសុវត្ថិភាព ដោយសារទឹកចាប់ផ្ដើមឡើងពីស្ទឹងលិចចូលដល់សង្កាត់ទាំងពីរនោះជាបន្តបន្ទាប់កាន់តែច្រើនឡើង។
អភិបាលខេត្តបន្ទាយមានជ័យ លោក អ៊ុ រាត្រី ក្នុងឱកាសចុះពិនិត្យស្ថានភាពទឹកកាលពីម្សិលមិញដឹងថា លោកបានណែនាំដល់អភិបាលក្រុង-ស្រុក ត្រូវធ្វើការចុះពិនិត្យតាមដានជាប្រចាំនូវស្ថានភាពទឹក ហើយបើក្នុងករណីចាំបាច់ត្រូវធ្វើការជម្លៀសប្រជាពលរដ្ឋភ្លាមៗទៅរកទីទួលសុវត្ថិភាព ដែលបានរៀបចំ។ ពិសេសអាជ្ញាធរនៅមូលដ្ឋានត្រូវណែនាំដល់ពលរដ្ឋដែលរស់នៅតំបន់ដែលប្រឈមនឹងទឹកជំនន់ សូមឲ្យពួកគាត់មានរៀបចំនូវសម្ភារៈរបស់របរមានតម្លៃ ឯកសារចាំបាច់ផ្សេងៗចៀសវាងប៉ះពាល់ឬខូចខាត់ដោយសារទឹកជំនន់ជាដើម។
នៅសប្ដាហ៍ចុងក្រោយនេះ ស្ថានភាពទឹកក្នុងខេត្តបន្ទាយមានជ័យបានហក់ឡើងដល់កម្រិតគួរឱ្យព្រួយបារម្ភ គួបផ្សំនឹងការការប្រកាសអាសន្នពីស្ថានភាពទឹកក្នុងខេត្តរបស់ប្រទេសថៃជាប់ព្រំដែនកម្ពុជា បានធ្វើឱ្យអាជ្ញាធរចេញសាងសង់ស្ពាន និងបើកផ្លូវរំដោះទឹកក្នុងអាងស្ដុកទឹកជាបន្តបន្ទាប់។ ក្នុងនោះដែរ អភិបាលខេត្តបន្ទាយមានជ័យក៏បានបញ្ជាឱ្យមន្ត្រីរបស់ខ្លួនរកទីទួលសុវត្ថិភាព និងសម្ភារៈសង្គ្រោះដល់ពលរដ្ឋដែលងាយរងគ្រោះពីទឹកជំនន់ផងដែរ៕
